(कविता) गुरु

बम बानिया-
गुरु
मलाई उड्ने रहर छ
चराजस्तै
आकाश चुम्ने चाहना छ
बगैचा मात्र हैन
कसैको घर सजाउन
गमलामा मात्र हैन
भिरपाखामा फुलेर
सुगन्ध छर्ने तृष्णा छ
सधै
किताब कापी र गृहकार्यको
चपेटा भन्दा माथि उठेर
किताबबाट टाढारहेका
मजस्तैहरुसंग
हातेमालो गर्दै
देशले भनिरहेको
समृद्धिको खाका कोर्ने सपना छ
गुरु
मिल्छ भने मनाई
थप यी यस्ता मौकाहरु दिनुहोस
म यो चार कोठे कक्षा कोठा भन्दा
बाहिर निस्कन चाहन्छु
मलाई बुझ्नुहोस्
यति मलाई बुझ्नुभो भने
म हजुरलाई सम्झिन
कुनै पूर्णीमा पर्खिने छैन ।
प्रकाशित मिति २०७५ साउन ११